<page>
<ignore>२५०
 
श्रीमद्भगवद्गीताभाष्ये
 
</ignore>
<verse>अत्येति तत्सर्वमिदं विदित्वा
 

योगी परं स्थानमुपैति चाद्यम् ॥ २८ ॥
 
</verse>
<p>इति श्रीमहाभारते शतसाहस्रर्यां संहितायां वैयासिक्यां

भीष्मपर्वणि श्रीमद्भगवद्गीतासूपनिषत्सु ब्रह्मविद्यायां

योगशास्त्रे श्रीकृष्णार्जुनसंवादे तारकब्रह्मयोगो नाम

अष्टमोऽध्यायः ॥
 

वेदेषु सम्यगधीतेषु यज्ञेषु च साद्गुण्येन अनुष्ठितेषु तपःसु

च सुतप्तेषु दानेषु च सम्यग्दत्तेषु, एतेषु यत् पुण्यफलं प्रदिष्टं

शास्त्रेण, अत्येति अतीत्य गच्छति तत् सर्व फलजातम् ; इदं

विदित्वा सप्तप्रश्ननिर्णयद्वारेण उक्तम् अर्थ सम्यक् अवधार्य

अनुष्ठाय योगी, परम् उत्कृष्टम् ऐश्वरं स्थानम् उपैति च

प्रतिपद्यते आद्यम् आदौ भवम्, कारणं ब्रह्म इत्यर्थः ॥
 
</p>
<trailer>इति श्रीमत्परमहंसपरिव्राजकाचार्यस्य श्रीगोविन्दभगवत्पूज्यपाद-

शिष्यस्य श्रीमच्छंकरभगवतः कृतौ श्रीमद्भगवद्गीताभाष्ये

अष्टमोऽध्यायः ॥
 
</trailer>
</page>