Reports » गणेशपञ्चरत्नम्

<lg n="1">
  <l>मुदा करात्तमोदकं सदा विमुक्तिसाधकं</l>
  <l>कलाधरावतंसकं विलासिलोकरक्षकम् ।</l>
  <l>अनायकैकनायकं विनाशितेभदैत्यकं</l>
  <l>नताशुभाशुनाशकं नमामि तं विनायकम् ॥ १ ॥</l>
</lg>
      

<lg n="2">
  <l>नतेतरातिभीकरं नवोदितार्कभास्वरं</l>
  <l>नमत्सुरारिनिर्जरं नताधिकापदुद्धरम् ।</l>
  <l>सुरेश्वरं निधीश्वरं गजेश्वरं गणेश्वरं</l>
  <l>महेश्वरं तमाश्रये परात्परं निरन्तरम् ॥ २ ॥</l>
</lg>
      

<lg n="3">
  <l>समस्तलोकशंकरं निरस्तदैत्यकुञ्जरं</l>
  <l>दरेतरोदरं वरं वरेभवक्त्रमक्षरम् ।</l>
  <l>कृपाकरं क्षमाकरं मुदाकरं यशस्करं</l>
  <l>मनस्करं नमस्कृतां नमस्करोमि भास्वरम् ॥ ३ ॥</l>
</lg>
      

<lg n="4">
  <l>अकिंचनार्तिमार्जनं चिरंतनोक्तिभाजनं</l>
  <l>पुरारिपूर्वनन्दनं सुरारिगर्वचर्वणम् ।</l>
  <l>प्रपञ्चनाशभीषणं धनंजयादिभूषणं</l>
  <l>कपोलदानवारणं भजे पुराणवारणम् ॥ ४ ॥</l>
</lg>
      

<lg n="5">
  <l>नितान्तकान्तदन्तकान्तिमन्तकान्तकात्मजम्</l>
  <l>अचिन्त्यरूपमन्तहीनमन्तरायकृन्तनम् ।</l>
  <l>हृदन्तरे निरन्तरं वसन्तमेव योगिनां</l>
  <l>तमेकदन्तमेव तं विचिन्तयामि संततम् ॥ ५ ॥</l>
</lg>
      

<lg n="6">
  <l>महागणेशपञ्चरत्नमादरेण योऽन्वहं</l>
  <l>प्रजल्पति प्रभातके हृदि स्मरन्गणेश्वरम् ।</l>
  <l>अरोगतामदोषतां सुसाहितीं सुपुत्रतां</l>
  <l>समाहितायुरष्टभूतिमभ्युपैति सोऽचिरात् ॥ ६ ॥</l>
</lg>