<lg n="2">
  <l>कनकमयवितर्दिशोभमानं</l>
  <l>दिशि दिशि पूर्णसुवर्णकुम्भयुक्तम् ।</l>
  <l>मणिमयमण्टपमध्यमेहि मात-</l>
  <l>र्मयि कृपयाशु समर्चनं ग्रहीतुम् ॥ २ ॥</l>
</lg>

<lg n="5">
  <l>कनकमयवितर्दिस्थापिते तूलिकाढ्ये</l>
  <l>विविधकुसुमकीर्णे कोटिबालार्कवर्णे ।</l>
  <l>भगवति रमणीये रत्नसिंहासनेऽस्मि -</l>
  <l>न्नुपविश पदयुग्मं हेमपीठे निधाय ॥ ५ ॥</l>
</lg>

<lg n="7">
  <l>दूर्वया सरसिजान्वितविष्णु-</l>
  <l>क्रान्तया च सहितं कुसुमाढ्यम् ।</l>
  <l>पद्मयुग्मसदृशे पदयुग्मे</l>
  <l>पाद्यमेतदुररीकुरु मातः ॥ ७ ॥</l>
</lg>

<lg n="9">
  <l>जलजद्युतिना करेण जाती-</l>
  <l>फलतक्कोललवङ्गगन्धयुक्तैः ।</l>
  <l>अमृतैरमृतैरिवातिशीतै-</l>
  <l>र्भगवत्याचमनं विधीयताम् ॥ ९ ॥</l>
</lg>

<lg n="14">
  <l>एलोशीरसुवासितैः सकुसुमैर्गङ्गादितीर्थोदकै-</l>
  <l>र्मणिक्यामलमौक्तिकामृतरसैः स्वच्छैः सुवर्णोदकैः ।</l>
  <l>मन्त्रान्वैदिकतान्त्रिकान्परिपठन्सानन्दमत्यादा-</l>
  <l>त्स्नानं ते परिकल्पयामि जननि स्नेहात्त्वमङ्गीकुरु ॥</l>
</lg>

<lg n="24">
  <l>सीमन्ते ते भगवति मया सादरं न्यस्तमेत-</l>
  <l>त्सिन्दूरं मे हृदयकमले हर्षवर्षं तनोति ।</l>
  <l>बालादित्यद्युतिरिव सदा लोहिता यस्य कान्ती-</l>
  <l>रन्तर्ध्वान्तं हरति सकलं चेतसा चिन्तयैव ॥ २४ ॥</l>
</lg>

<lg n="25">
  <l>मन्दारकुन्दकरवीरलवङ्गपुष्पै-</l>
  <l>स्त्वां देवि संततमहं परिपूजयामि ।</l>
  <l>जातीजपावकुलचम्पककेतकादि-</l>
  <l>नानाविधानि कुसुमानि च तेऽर्पयामि ॥ २५ ॥</l>
</lg>

<lg n="28">
  <l>लाक्षासंमिलितैः सिताभ्रसहितैः श्रीवाससंमिश्रितैः</l>
  <l>कर्पूराकलितैः शिरैर्मधुयुतैर्गोसर्पिषा लोडितैः ।</l>
  <l>श्रीखण्डागरुगुग्गुलुप्रभृतिभिर्नानाविधैर्वस्तुभि-</l>
  <l>र्धूपं ते परिकल्पयामि जननि स्नेहात्त्वमङ्गीकुरु ॥ २८ ॥</l>
</lg>

<lg n="31">
  <l>सापूपसूपदधिदुग्धसिताघृतानि</l>
  <l>सुस्वादुभक्तपरमान्नपुरःसराणि ।</l>
  <l>शाकोल्लसन्मरिचिजीरकबाहिकानि</l>
  <l>भक्ष्याणि भुङ्क्ष्व जगदम्ब मयार्पितानि ॥ ३१ ॥</l>
</lg>

<lg n="45">
  <l>मार्ताण्डमण्डलनिभो जगदम्ब योऽयं</l>
  <l>भक्त्या मया मणिमयो मुकुरोऽर्पितस्ते ।</l>
  <l>पूर्णेन्दुबिम्बरुचिरं वदनं स्वकीय-</l>
  <l>मस्मिन्विलोकय विलोलविलोचने त्वम् ॥ ४५ ॥</l>
</lg>

<lg n="46">
  <l>इन्द्रादयो नतिनतैर्मकुटप्रदीपै-</l>
  <l>र्नीराजयन्ति सततं तव पादपीठम् ।</l>
  <l>तस्मादहं तव समस्तशरीरमेत-</l>
  <l>न्नीराजयामि जगदम्ब सहस्रदीपैः ॥ ४६ ॥</l>
</lg>

<lg n="50">
  <l>हयगजरथपत्तिशोभमानं</l>
  <l>दिशि दिशि दुन्दुभिमेघनादयुक्तम् ।</l>
  <l>अतिबहु चतुरङ्गसैन्यमेत-</l>
  <l>द्भगवति भक्तिभरेण तेऽर्पयामि ॥ ५० ॥</l>
</lg>

<lg n="51">
  <l>परिघीकृतसप्तसागरं</l>
  <l>बहुसंपत्सहितं मयाम्ब ते विपुलम् ।</l>
  <l>प्रबलं धरणीतलाभिधं</l>
  <l>दृढदुर्गं निखिलं समर्पयामि ॥ ५१ ॥</l>
</lg>

<lg n="55">
  <l>भ्रमदलिकुलतुल्यालोलधम्मिल्लभाराः</l>
  <l>स्मितमुखकमलोद्यद्दिव्यलावण्यपूराः ।</l>
  <l>अनुपमितसुवेषा वारयोषा नटन्ति</l>
  <l>परभृतकलकण्ठ्यो देवि दैन्यं धुनोतु ॥ ५५ ॥</l>
</lg>

<lg n="57">
  <l>विपञ्चीषु सप्तस्वरान्वादयन्त्य-</l>
  <l>स्तव द्वारि गायन्ति गन्धर्वकन्याः ।</l>
  <l>क्षणं सावधानेन चित्तेन मातः</l>
  <l>समाकर्णय त्वं मया प्रार्थितासि ॥ ५७ ॥</l>
</lg>

<lg n="60">
  <l>पदे पदे यत्परिपूजकेभ्यः सद्योऽश्वमेधादिफलं ददाति ।</l>
  <l>तत्सर्वपापक्षयहेतुभूतं प्रदक्षिणं ते परितः करोमि ॥ ६० ॥</l>
</lg>

<lg n="61">
  <l>रक्तोत्पलारक्तलताप्रभाभ्यां ध्वजोर्ध्वरेखाकुलिशाङ्किताभ्याम् ।</l>
  <l>अशेषबृन्दारकवन्दिताभ्यां नमो भवानीपदपङ्कजाभ्याम् ॥</l>
</lg>

<lg n="64">
  <l>एतस्मिन्मणिखचिते सुवर्णपीठे</l>
  <l>त्रैलोक्याभयवरदौ निधाय हस्तौ ।</l>
  <l>विस्तीर्णे मृदुलतरोत्तरच्छदेऽस्मि -</l>
  <l>न्पर्यङ्के कनकमये निषीद मातः ॥ ६४ ।</l>
</lg>

<lg n="67">
  <l>क्षणमथ जगदम्ब मञ्चकेऽस्मि-</l>
  <l>न्मृदुतलतूलिकया विराजमाने ।</l>
  <l>अतिरहसि मुदा शिवेन सार्धं</l>
  <l>सुखशयनं कुरु तत्र मां स्मरन्ती ॥ ६७ ॥</l>
</lg>