j
 
<page>
<ignore>श्रीवानाद्रिनाथदयितास्तोत्रम्
 
६९३</ignore>
<verse>सौन्दर्यवल्लि कमले सकलैकमातः

सर्वाङ्गसुन्दरमनोहरदिव्यरूपे ।

पद्मे मनोज्ञवदने सुभगे सुशीले
 

त्वत्पादपङ्कजयुगं शरणं गतोऽस्मि ॥ १० ॥
 
</verse>
<verse>वितर वितर भद्रं सम्पदं भक्तिरूपा-
 

मिह च मम परत्र श्रीपतौ भाष्यकारे ।

वरवरमुनिवर्ये त्वत्पदाम्भोजयुग्मे
 

मम तु जलधिकन्ये निश्चलां लोकमातः ॥। ११ ॥
 
</verse>
<verse>कलशजलधिकन्ये लोकमातः सुशीले

स्मितविलसितवक्त्रे कल्पवल्लि श्रितानाम् ।

दिवि भुवि वनशैलक्ष्मापतेर्वल्लभे श्रीः
 

मम तु तव पदाब्जे निश्चला भक्तिरस्तु ॥ १२ ॥
</verse>
<verse>दिवि भुवि मम पद्मे सम्पदं भक्तिरूपां

वितर तव पदाब्जे सुन्दर श्रीपदाब्जे ।

शठरिपुपदपद्मे भाष्यकारे यतीन्द्रे
 

वरवरमुनिवर्ये लक्ष्मि कल्याणशीले ॥ १३ ॥
 
</verse>
<verse>कल्याणशीले रमणीयगात्रे

लावण्य सौन्दर्यनिधे मनोज्ञे ।

कल्याणदे कल्पलते श्रितानां
 

पद्मे प्रयच्छ प्रियमब्धिकन्ये ॥ १४ ॥
 
</verse>
<verse>प्रियमिह मम पद्मे संप्रयच्छ प्रयच्छ
 

तव तु चरणपद्मे संस्मरामि स्मरामि ।

गतिरिह मम नास्ति त्वत्पदाम्भोजयुग्मा-

दशरणमतिदीनं पाहि मां सिन्धुकन्ये ॥ १५ ॥
 
</verse>
<verse>शरणमिह परत्र त्वत्पदाम्भोजयुग्मं
 

मम वनगिरिराजः पादकैङ्कर्यलक्ष्म्याः ।

सपदि किल ततस्त्वं लक्ष्मि पद्मायताक्षि

सकलभुवनमातः पाहि मां सिन्धुकन्ये ॥ १६ ॥
 
</verse>
<verse>नमो लोकमातो न माता विना त्वां
 

रमे सिन्धुकन्ये सरोजायताक्षि ।
 

ततस्त्वं सुशीले प्रसीद प्रसीद
 

प्रियं विष्णुकान्ते प्रयच्छ प्रयच्छ ॥ १७ ॥
 
६९३
 
</verse>
</page>