<page>
<ignore>६८२
 
देवीस्तोत्रेषु
 
</ignore>
<verse>कमले कमलारुणदिव्यमुखे

सुखदे जगतां खलु कल्पलते ।

अयि मामवलोकय सिन्धुसुते
 

कृपया तव केवलमब्जपदे ॥ ७ ॥
 
</verse>
<verse>पतितं भववारिधिमध्यगतं
 

सततं विमतं जनताभिमते ।

अयि मामवलोकय पद्मकरे
 

दयिते जगदीश्वर रङ्गपतेः ॥ ८ ॥
 
</verse>
<verse>पदयोः शरणागतमब्धिसुते
 

तव दीनमकिञ्चनमार्तियुतम् ।

अयि मामवलोकय रङ्गपते-
 

र्दयिते विधिशङ्करमुख्यपतेः ॥ ९ ॥
 
</verse>
<verse>अपि दुःसहपापशतैर्भरितं
 

जगतां जननि क्षमया कमले ।

परिपालय मां दयनीयमिमं
 

परिदीनहृदं तव रङ्गपतेः ॥ १० ॥
 
</verse>
<verse>युवयोरपि दुःसहपापशतै-

र्भुवनेश्वरि रङ्गपतेर्दयिते ।

अपि मां भरितं परिपालय ते
 

दयया शरणागतिकं पदयोः ॥ ११ ॥
 
</verse>
<verse>मातः प्रसीद कमले जगतां सुशीले

तापत्रयीजनितदुःखसहस्रसङ्घैः ।

पापैरनन्यगतिकं भरितं च दीनं
 

मां रक्ष दिव्यकृपया शरणागतं त्वाम् ॥ १२ ॥
 
</verse>
<verse>युष्मत्पदाम्बुजयुगं शरणं गतस्य
 

मातः प्रयच्छ वरदे जगतां प्रियं मे ।
 

श्रीरङ्गनायकि मनोहरदिव्यरूपे
 

पाहि प्रसीद कमले सुभगे सुशीले ॥ १३ ॥
 
</verse>
<verse>भवसिन्धुमग्नमरविन्दलोचने
 

प्रणतप्रसन्नमुखचन्द्रमण्डले ।
 

परिपालयाद्य दयनीय दुर्दश
 
शं
कृपया च मां च कमले दयानिधे ॥ १४ ॥
 
</verse>
</page>