<page>
<ignore>श्रीरङ्गनाथस्तोत्रम्
 
४९७</ignore>
<verse>रङ्गाधिपं रविकुलीननृपैः सुपूज्यं

भोगीन्द्र भोगशयनीयतले शयानम् ।

ज्ञानप्रदं तनुभृतां वरदं वरेण्यं
 

श्रीनाथमादरमहं सततं भजामि ॥ १४ ॥
 
</verse>
<trailer text="17_END">॥ इति सुदर्शन वरदनारायणदासकृता श्रीगोविन्दराजस्तुतिः

सम्पूर्णा ॥
 
</trailer>
<footnote text="18_START">१८. ॥ अथ श्रीरङ्गनाथस्तोत्रम् ॥
 
</footnote>
<verse>श्रीरङ्गे शेषशायी विलसति भगवान् दिव्यवैकुण्ठनाथः

कावेरी दिव्यगन्धा विलसति विरजा दिव्यतीर्थप्रशस्ता ।

श्रीरङ्गं दिव्यरङ्गं विलसति नगरं दिव्यंयवैकुण्ठमेव
 

श्रीमन्तः सूरिसङ्घा दिवि च विलसिता रङ्गदेशस्थभक्ताः ॥ १ ॥
</verse>
<verse>प्रत्युप्तैः पद्मरागस्फटिकमरकतैर्दिव्यमाणिक्यसङ्घः
 

प्राकारै र्गोपुराद्यैर्विलसति विमले दिव्यवैकुण्ठतुल्ये ।

श्रीरङ्गे शेषशायी शतमख मणिभिस्तुल्यकल्याणगात्रो
 

भक्तानां कल्पवृक्षो दिशतु मम सुखं रङ्गनाथो दयालुः ॥ २ ॥
</verse>
<verse>अम्भोजाक्षः सुशीलः शुभगुणनिलयश्चन्द्रकान्ताननाब्जः

वक्षःस्थल्यां विराजन्मणिवर कमलावत्स जाज्वल्यमानः ।

माणिक्यच्छन्नमौलिर्मणिमयवलयो भक्तकल्याणदाता
 

वैकुण्ठः शेषशायी दिशतु मम सुखं रङ्गनाथो दयालुः ॥ ३ ॥
</verse>
<verse>सर्वज्ञः सर्वशक्तः सकलगुणनिधिः सत्यकामः सुरेशः

श्रीवत्सः श्रीनिवासः श्रितजनवरदः सर्वसौहार्दसिन्धुः ।

श्रीरङ्गे दिव्यदेशे सकलजननिधौ शेषतल्पे शयानो

मेघश्यामः कृपालुर्दिशतु मम सुखं रङ्गनाथो मुकुन्दः ॥ ४ ॥
</verse>
<verse>श्रीरङ्गश्रीनगर्यां ज्वलितमणिफणे नागराजे शयानः

ब्रह्माद्यैः सूरिसङ्घैः स्तुतपदकमलः सर्वलोकप्रसिद्धः ।

मुग्धस्मेरः श्रुतीनां शिरसि विलसितः सिन्धुजावत्सवक्षाः

कारुण्याब्धिर्वदान्यो दिशतु मम सुखं रङ्गनाथो मुकुन्दः ॥ ५ ॥
 
</verse>
<verse>प्रत्यक्षं परमं पदं दिवि भुवि श्रीरङ्गमत्यद्भुतं
 

तत्र श्रीभगवान् फणीन्द्रशयनः श्रीरङ्गराजो विभुः ।

लक्ष्मीदिव्यनिवासकौस्तुभमणिः श्रीवत्सवक्षःस्थलो
 

जीयाद् भूतदयालुरम्बुजमुखः श्रीवैष्णवानां निधिः ॥ ६ ॥
 
</verse>
<ignore>32
 
४९७
 
</ignore>
</page>