रामचरितम् /33

2022-07-29 02:52:58 by akprasad

This page has been fully proofread once and needs a second look.

अभिनन्दविरचितम्

रामचरितम् ॥

प्रथमः सर्गः ।

अथ माल्यवतः प्रस्थे काकुत्स्थस्य वियोगिनः |
दुर्निवाराश्रुसंवेगो जगाम जलदागमः ॥ १ ॥

शशाम दृष्टिर्मेघानामुत्सङ्गे तस्य भूभृतः ।
विरराम न रामस्य धारासन्ततिरश्रुणः ॥ २ ॥

इतस्ततः परिणतिं भेजे बर्हिणकूजितम् ।
हा प्रिये राजपुत्रीति न रामपरिदेवितम् ॥ ३ ॥

काप्यभिख्या विरजसोः सूर्याचन्द्रमसोरभूत् ।
दाशरथ्योस्तथैवासीदयोगोपहता रुचिः ॥ ४ ॥

निर्मलेन्दु नभो रेजे विकचाब्जं बभौ सरः ।
परं पर्यश्रुवदनौ मम्लतुर्भ्रातरावुभौ ॥ ५ ॥

स्मर्तव्यकलिकाजालं जज्ञे कुटजकाननम् ।
आसीत्तथैव तु मनो रामस्योत्कलिकाकुलम् ॥ ६ ॥

प्रपेदे पुनरुद्भेदः शुचिनां[१] कच्छकेतकैः ।
उपक्रियायाः सदृशं नारेभे रविसुनुना ॥ ७ ॥

आकृष्टमालतीगन्धः सिषेवे राघवं मरुत् ।
आनीतमैथिलीवार्तस्तमार्ते न तु मारुतिः ॥ ८ ॥

---

१ AB चीनां | c शूचीना |