Collected works of Kavyakantha Ganapati Muni /42

<page>
<ignore lang="sa">स्तोत्रग्रन्थमाला - तृतीयो भागः
 
</ignore>
<verse lang="sa">रुधिरार्द्रमजिनमंसे परितोऽङ्गानि श्मशानभसितरजः ।

कण्ठे कपालमाला वेषोऽयं यस्य दुरवगाहार्थः ॥ ८ ॥
 
</verse>
<ignore lang="sa">८
 
</ignore>
<verse lang="sa">भुवनं झरैः कतिपयैरावृण्वाना युगान्तमिव कर्तुम् ।

यस्य जटापटलमिता गङ्गा नार्द्रीचकार कोणमपि ॥९॥
 
</verse>
<verse lang="sa">हित्वा मानसशालां विज्ञानमयेऽवतीर्य निजरूपे ।

आनन्दं पश्यन्तो यं मुनयो यान्ति संसृतेः पारम् ॥ १० ॥
 
</verse>
<heading lang="sa">अथ द्वितीयं उपजातिदशकम्
 
</heading>
<verse lang="sa">उमावपुः सौरभमुद्गिरन्तो भूषेन्दुपीयूषकणान् किरन्तः।

भूतेशचूडासरितस्तवाशु भूयासुरायासहराः समीराः ॥११॥
 
</verse>
<verse lang="sa">मुहुर्मुहुर्दिक्षु वमन्नपर्णा धम्मिल्लसन्तानलतान्तगन्धम् ।

दुःखानि वो धूर्जटिजाटजूटस्रोतस्विनी वातशिशुर्धुनोतु ॥ १२ ॥
 
</verse>
<verse lang="sa">आश्लिष्य पीयूषमयूखरेखां गाढं जगद्राजजटानिकुञ्जे ।

बहिः शनैः सञ्चलितः सुखं वः सुरस्रवन्ती पवनस्तनोतु ॥ १३ ॥
 
</verse>
<verse lang="sa">स्वेदं हरन्नङ्गभवं गणानां दिने दिनेऽङ्गीकृतताण्डवानाम् ।

युष्माकमेनांसि महेशमौलिमन्दाकिनीमन्दमरुद्धुनोतु ॥ १४ ॥
 
</verse>
<verse lang="sa">स्विद्यन्ति ते कन्दुककेलिसङ्गादङ्गानि मातङ्गमुखस्य मातुः ।

चिरं भजन्तः शिवशीर्षगङ्गाभङ्गानिलाः शान्तिमितो भणन्तु ॥ १५॥
 
</verse>
</page>