श्रीहरिं परमानन्दमुपदेष्टारमीश्वरम् ।व्यापकं सर्वलोकानां कारणं तं नमाम्यहम् ॥ १ ॥

▼

Edit Permalink Bookmark

अपरोक्षानुभूतिर्वै प्रोच्यते मोक्षसिद्धये ।सद्भिरेषा प्रयत्नेन वीक्षणीया मुहुर्मुहुः ॥ २ ॥

▼

Edit Permalink Bookmark

स्ववर्णाश्रमधर्मेण तपसा हरितोषणात् ।साधनं प्रभवेत्पुंसां वैराग्यादिचतुष्टयम् ॥ ३ ॥

▼

Edit Permalink Bookmark

ब्रह्मादिस्थावरान्तेषु वैराग्यं विषयेष्वनु ।यथैव काकविष्ठायां वैराग्यं तद्धि निर्मलम् ॥ ४ ॥

▼

Edit Permalink Bookmark

नित्यमात्मस्वरूपं हि दृश्यं तद्विपरीतगम् ।एवं यो निश्चयः सम्यग्विवेको वस्तुनः स वै ॥ ५ ॥

▼

Edit Permalink Bookmark

सदैव वासनात्यागः शमोऽयमिति शब्दितः ।निग्रहो बाह्यवृत्तीनां दम इत्यभिधीयते ॥ ६ ॥

▼

Edit Permalink Bookmark

विषयेभ्यः परावृत्तिः परमोपरतिर्हि सा ।सहनं सर्वदुःखानां तितिक्षा सा शुभा मता ॥ ७ ॥

▼

Edit Permalink Bookmark

निगमाचार्यवाक्येषु भक्तिः श्रद्धेति विश्रुता ।चित्तैकाग्र्यं तु सल्लक्ष्ये समाधानमिति स्मृतम् ॥ ८ ॥

▼

Edit Permalink Bookmark

संसारबन्धनिर्मुक्तिः कथं स्यान्मे दयानिधे ।इति या सुदृढा बुद्धिर्वक्तव्या सा मुमुक्षुता ॥ ९ ॥

▼

Edit Permalink Bookmark

उक्तसाधनयुक्तेन विचारः पुरुषेण हि ।कर्तव्यो ज्ञानसिद्ध्यर्थमात्मनः शुभमिच्छता ॥ १० ॥

▼

Edit Permalink Bookmark

नोत्पद्यते विना ज्ञानं विचारेणान्यसाधनैः ।यथा पदार्थभानं हि प्रकाशेन विना क्वचित् ॥ ११ ॥

▼

Edit Permalink Bookmark

कोऽहं कथमिदं जातं को वा कर्तास्य विद्यते ।उपादानं किमस्तीह विचारः सोऽयमीदृशः ॥ १२ ॥

▼

Edit Permalink Bookmark

नाहं भूतगणो देहो नाहं चाक्षगणस्तथा ।एतद्विलक्षणः कश्चिद्विचारः सोऽयमीदृशः ॥ १३ ॥

▼

Edit Permalink Bookmark

अज्ञानप्रभवं सर्वं ज्ञानेन प्रविलीयते ।संकल्पो विविधः कर्ता विचारः सोऽयमीदृशः ॥ १४ ॥

▼

Edit Permalink Bookmark

एतयोर्यदुपादानमेकं सूक्ष्मं सदव्ययम् ।यथैव मृद्घटादीनां विचारः सोऽयमीदृशः ॥ १५ ॥

▼

Edit Permalink Bookmark

अहमेकोऽपि सूक्ष्मश्च ज्ञाता साक्षी सदव्ययः ।तदहं नात्र संदेहो विचारः सोऽयमीदृशः ॥ १६ ॥

▼

Edit Permalink Bookmark

आत्मा विनिष्कलो ह्येको देहो बहुभिरावृतः ।तयोरैक्यं प्रपश्यन्ति किमज्ञानमतः परम् ॥ १७ ॥

▼

Edit Permalink Bookmark

आत्मा नियामकश्चान्तर्देहो नियम्यबाह्यकः ।तयोरैक्यं प्रपश्यन्ति किमज्ञानमतः परम् ॥ १८ ॥

▼

Edit Permalink Bookmark

आत्मा ज्ञानमयः पुण्यो देहो मांसमयोऽशुचिः ।तयोरैक्यं प्रपश्यन्ति किमज्ञानमतः परम् ॥ १९ ॥

▼

Edit Permalink Bookmark

आत्मा प्रकाशकः स्वच्छो देहस्तामस उच्यते ।तयोरैक्यं प्रपश्यन्ति किमज्ञानमतः परम् ॥ २० ॥

▼

Edit Permalink Bookmark

आत्मा नित्यो हि सद्रूपो देहोऽनित्यो ह्यसन्मयः ।तयोरैक्यं प्रपश्यन्ति किमज्ञानमतः परम् ॥ २१ ॥

▼

Edit Permalink Bookmark

आत्मनस्तत्प्रकाशत्वं यत्पदार्थावभासनम् ।नाग्न्यादिदीप्तिवद्दीप्तिर्भवत्यान्ध्यं यतो निशि ॥ २२ ॥

▼

Edit Permalink Bookmark

देहोऽहमित्ययं मूढो मत्वा तिष्ठत्यहो जनः ।ममायमित्यपि ज्ञात्वा घटद्रष्टेव सर्वदा ॥ २३ ।

▼

Edit Permalink Bookmark

ब्रह्मैवाहं समः शान्तः सच्चिदानन्दलक्षणः ।नाहं देहो ह्यसद्रूपो ज्ञानमित्युच्यते बुधैः ॥ २४ ॥

▼

Edit Permalink Bookmark

निर्विकारो निराकारो निरवद्योऽहमव्ययः ।नाहं देहो ह्यसद्रूपो ज्ञानमित्युच्यते बुधैः ॥ २५ ॥

▼

Edit Permalink Bookmark

निरामयो निराभासो निर्विकल्पोऽहमाततः ।नाहं देहो ह्यसद्रूपो ज्ञानमित्युच्यते बुधैः ॥ २६ ॥

▼

Edit Permalink Bookmark

निर्गुणो निष्क्रियो नित्यो नित्यमुक्तोऽहमच्युतः ।नाहं देहो ह्यसद्रूपो ज्ञानमित्युच्यते बुधैः ॥ ॥ २७ ॥

▼

Edit Permalink Bookmark

निर्मलो निश्चलोऽनन्तः शुद्धोऽहमजरोऽमरः ।नाहं देहो ह्यसद्रूपो ज्ञानमित्युच्यते बुधैः ॥ २८ ॥

▼

Edit Permalink Bookmark

स्वदेहं शोभनं त्यक्त्वा पुरुषाख्यं च संमतम् ।किं मूर्ख शून्यमात्मानं देहातीतं करोषि भो ॥ २९ ॥

▼

Edit Permalink Bookmark

स्वात्मानं शृणु मूर्ख त्वं श्रुत्या युक्त्या च पूरुषम् ।देहातीतं सदाकारं सुदुर्दर्शं भवादृशाम् ॥ ३० ॥

▼

Edit Permalink Bookmark

अहंशब्देन विख्यात एक एव स्थितः परः ।स्थूलत्वान्नैकतां प्राप्तः कथं स्याद्देहकः पुमान्॥३१ ॥

▼

Edit Permalink Bookmark

अहं द्रष्टृतया सिद्धो देहो दृश्यतया स्थितः ।ममायमिति निर्देशात्कथं स्याद्देहकः पुमान् ॥ ३२ ॥

▼

Edit Permalink Bookmark

अहं विकारहीनस्तु देहो नित्यं विकारवान् ।इति प्रतीयते साक्षात्कथं स्याद्देहकः पुमान् ॥ ३३ ॥

▼

Edit Permalink Bookmark

यस्मात्परमिति श्रुत्या तथा पुरुषलक्षणम् ।विनिर्णीतं विशुद्धेन कथं स्याद्देहकः पुमान् ॥ ३४ ॥

▼

Edit Permalink Bookmark

सर्वं पुरुष एवेति सूक्ते पुरुषसंज्ञिते ।अप्युच्यते यतः श्रुत्या कथं स्याद्देहकः पुमान् ॥ ३५ ॥

▼

Edit Permalink Bookmark

असङ्गः पुरुषः प्रोक्तो बृहदारण्यकेऽपि च ।अनन्तमलसंसृष्टः कथं स्याद्देहकः पुमान् ॥ ३६ ॥

▼

Edit Permalink Bookmark

तत्रैव च समाख्यातः स्वयंज्योतिर्हि पूरुषः ।जडः परप्रकाश्योऽयं कथं स्याद्देहकः पुमान् ॥ ३७ ॥

▼

Edit Permalink Bookmark

प्रोक्तोऽपि कर्मकाण्डेन ह्यात्मा देहाद्विलक्षणः ।नित्यश्च तत्फलं भुङ्क्ते देहपातादनन्तरम् ॥ ३८ ॥

▼

Edit Permalink Bookmark

लिङ्गं चानेकसंयुक्तं चलं दृश्यं विकारि च ।अव्यापकमसद्रूपं तत्कथं स्यात्पुमानयम् ॥ ३९ ॥

▼

Edit Permalink Bookmark

एवं देहद्वयादन्य आत्मा पुरुष ईश्वरः ।सर्वात्मा सर्वरूपश्च सर्वातीतोऽहमव्ययः ॥ ४० ॥

▼

Edit Permalink Bookmark

इत्यात्मदेहभानेन प्रपञ्चस्यैव सत्यता ।यथोक्ता तर्कशास्त्रेण ततः किं पुरुषार्थता ॥ ४१ ॥

▼

Edit Permalink Bookmark

इत्यात्मदेहभेदेन देहात्मत्वं निवारितम् ।इदानीं देहभेदस्य ह्यसत्त्वं स्फुटमुच्यते ॥ ४२ ॥

▼

Edit Permalink Bookmark

चैतन्यस्यैकरूपत्वाद्भेदो युक्तो न कर्हिचित् ।जीवत्वं च मृषा ज्ञेयं रज्ज्वां सर्पग्रहो यथा ॥ ४३ ॥

▼

Edit Permalink Bookmark

रज्ज्वज्ञानात्क्षणेनैव यद्वद्रज्जुर्हि सर्पिणी ।भाति तद्वच्चितिः साक्षाद्विश्वाकारेण केवला ॥ ४४ ॥

▼

Edit Permalink Bookmark

उपादानं प्रपञ्चस्य ब्रह्मणोऽन्यन्न विद्यते ।तस्मात्सर्वप्रपञ्चोऽयं ब्रह्मैवास्ति न चेतरत् ॥ ४५ ॥

▼

Edit Permalink Bookmark

व्याप्यव्यापकता मिथ्या सर्वमात्मेति शासनात् ।इति ज्ञाते परे तत्त्वे भेदस्यावसरः कुतः ॥ ४६ ॥

▼

Edit Permalink Bookmark

श्रुत्या निवारितं नूनं नानात्वं स्वमुखेन हि ।कथं भासो भवेदन्यः स्थिते चाद्वयकारणे ॥ ४७ ॥

▼

Edit Permalink Bookmark

दोषोऽपि विहितः श्रुत्या मृत्योर्मृत्युं स गच्छति ।इह पश्यति नानात्वं मायया वञ्चितो नरः ॥ ४८ ॥

▼

Edit Permalink Bookmark

ब्रह्मणः सर्वभूतानि जायन्ते परमात्मनः ।तस्मादेतानि ब्रह्मैव भवन्तीत्यवधारयेत् ॥ ४९ ॥

▼

Edit Permalink Bookmark

ब्रह्मैव सर्वनामानि रूपाणि विविधानि च ।कर्माण्यपि समग्राणि विभर्तीति श्रुतिर्जगौ ॥ ५० ॥

▼

Edit Permalink Bookmark

सुवर्णाज्जायमानस्य सुवर्णत्वं च शाश्वतम् ।ब्रह्मणो जायमानस्य ब्रह्मत्वं च तथा भवेत् ॥ ५१ ॥

▼

Edit Permalink Bookmark

स्वल्पमप्यन्तरं कृत्वा जीवात्मपरमात्मनोः ।योऽवतिष्ठति मूढात्मा भयं तस्याभिभाषितम् ॥ ५२ ॥

▼

Edit Permalink Bookmark

यत्राज्ञानाद्भवेद्द्वैतमितरस्तत्र पश्यति ।आत्मत्वेन यदा सर्वं नेतरस्तत्र चाण्वपि ॥ ५३ ॥

▼

Edit Permalink Bookmark

यस्मिन्सर्वाणि भूतानि ह्यात्मत्वेन विजानतः ।न वै तस्य भवेन्मोहो न च शोकोऽद्वितीयतः ॥ ५४ ॥

▼

Edit Permalink Bookmark

अयमात्मा हि ब्रह्मैव सर्वात्मकतया स्थितः ।इति निर्धारितं श्रुत्या बृहदारण्यसंस्थया ॥ ५५ ॥

▼

Edit Permalink Bookmark

अनुभूतोऽप्ययं लोको व्यवहारक्षमोऽपि सन् ।असद्रूपो यथा स्वप्न उत्तरक्षणबाधतः ॥ ५६ ॥

▼

Edit Permalink Bookmark

स्वप्नो जागरणेऽलीकः स्वप्नेऽपि न हि जागरः ।द्वयमेव लये नास्ति लयोऽपि ह्युभयोर्न च ॥ ५७ ॥

▼

Edit Permalink Bookmark

वयमेवं भवेन्मिथ्या गुणत्रयविनिर्मितम् ।अस्य द्रष्टा गुणातीतो नित्यो ह्येकचिदात्मकः ॥ ५८ ॥

▼

Edit Permalink Bookmark

यद्वन्मृदि घटभ्रान्तिं शुक्तौ वा रजतस्थितिम् ।तद्वद्ब्रह्मणि जीवत्वं भ्रान्त्या पश्यति न स्वतः ॥ ५९ ॥

▼

Edit Permalink Bookmark

यथा मृदि घटो नाम कनके कुण्डलाभिधा ।शुक्तौ हि रजतख्यातिर्जीवशब्दस्तथा परे ॥ ६० ॥

▼

Edit Permalink Bookmark

यथैव व्योनि नीलत्वं यथा नीरं मरुस्थले ।पुरुषत्वं यथा स्थाणौ तद्वद्विश्वं चिदात्मनि ॥ ६१ ॥

▼

Edit Permalink Bookmark

यथैव शून्ये वेतालो गन्धर्वाणां पुरं यथा ।यथाकाशे द्विचन्द्रत्वं तद्वत्सत्ये जगत्स्थितिः ॥ ६२ ॥

▼

Edit Permalink Bookmark

यथा तरङ्गकल्लोलैर्जलमेव स्फुरत्यलम् ।पात्ररूपेण ताम्रं हि ब्रह्माण्डौघैस्तथात्मता ॥ ६३ ॥

▼

Edit Permalink Bookmark

घटनाम्ना यथा पृथ्वी पटनाम्ना हि तन्तवः ।जगन्नाम्ना चिदाभाति ज्ञेयं तत्तदभावतः ॥ ६४ ॥

▼

Edit Permalink Bookmark

सर्वोऽपि व्यवहारस्तु ब्रह्मणा क्रियते जनैः ।अज्ञानान्न विजानन्ति मृदेव हि घटादिकम् ॥ ६५ ॥

▼

Edit Permalink Bookmark

कार्यकारणता नित्यमास्ते घटमृदोर्यथा ।तथैव श्रुतियुक्तिभ्यां प्रपञ्चब्रह्मणोरिह ॥ ६६ ॥

▼

Edit Permalink Bookmark

गृह्यमाणे घटे यद्वन्मृत्तिका भाति वै बलात् ।वीक्ष्यमाणे प्रपञ्चेऽपि ब्रहैवाभाति भासुरम् ॥ ६७ ॥

▼

Edit Permalink Bookmark

सदैवात्मा विशुद्धोऽपि ह्यशुद्धो भाति वै सदा ।यथैव द्विविधा रज्जुर्ज्ञानिनोऽज्ञानिनोऽनिशम् ॥ ६८ ॥

▼

Edit Permalink Bookmark

यथैव मृन्मयः कुम्भस्तद्वद्देहोऽपि चिन्मयः ।आत्मानात्मविभागोऽयं मुधैव क्रियते बुधैः ॥ ६९ ॥

▼

Edit Permalink Bookmark

सर्पत्वेन यथा रज्जू रजतत्वेन शुक्तिका ।विनिर्णीता विमूढेन देहत्वेन तथात्मता ॥ ७० ॥

▼

Edit Permalink Bookmark

घटत्वेन यथा पृथ्वी पदत्वेनैव तन्तवः ।विनिर्णीता विमूढेन देहत्वेन तथात्मता ॥ ७१ ॥

▼

Edit Permalink Bookmark

कनकं कुण्डलत्वेन तरङ्गत्वेन वै जलम् ।विनिर्णीता विमूढेन देहत्वेन तथात्मता ॥ ७२ ॥

▼

Edit Permalink Bookmark

पुरुषत्वेन वै स्थाणुर्जलत्वेन मरीचिका ।विनिर्णीता विमूढेन देहत्वेन तथात्मता ॥ ७३ ॥

▼

Edit Permalink Bookmark

गृहत्वेनैव काष्ठानि खड्गत्वेनैव लोहता ।विनिर्णीता विमूढेन देहत्वेन तथात्मता ॥ ७४ ॥

▼

Edit Permalink Bookmark

यथा वृक्षविपर्यासो जलाद्भवति कस्यचित् ।तद्वदात्मनि हेहत्वं पश्यत्यज्ञानयोगतः ॥ ६५ ॥

▼

Edit Permalink Bookmark

पोतेन गच्छतः पुंसः सर्वं भातीव चञ्चलम् ।तद्वदात्मनि देहत्वं पश्यत्यज्ञानयोगतः ॥ ७६ ॥

▼

Edit Permalink Bookmark

पीतत्वं हि यथा शुभ्रे दोषाद्भवति कस्यचित् ।तद्वदात्मनि देहत्वं पश्यत्यज्ञानयोगतः ॥ ७७ ॥

▼

Edit Permalink Bookmark

चक्षुर्भ्यां भ्रमशीलाभ्यां सर्वं भाति भ्रमात्मकम् ।तद्वदात्मनि देहत्वं पश्यत्यज्ञानयोगतः ॥ ७८ ॥

▼

Edit Permalink Bookmark

अलातं भ्रमणेनैव वर्तुलं भाति सूर्यवत् ।तद्वदात्मनि देहत्वं पश्यत्यज्ञानयोगतः ॥ ७९ ॥

▼

Edit Permalink Bookmark

महत्त्वे सर्ववस्तूनामणुत्वं ह्यतिदूरतः ।तद्वदात्मनि देहत्वं पश्यत्यज्ञानयोगतः ॥ ८० ॥

▼

Edit Permalink Bookmark

सूक्ष्मत्वे सर्ववस्तूनां स्थूलत्वं चोपनेत्रतः ।तद्वदात्मनि देहत्वं पश्यत्यज्ञानयोगतः ॥ ८१ ॥

▼

Edit Permalink Bookmark

काचभूमौ जलत्वं वा जलभूमौ हि काचता ।तद्वदात्मनि देहत्वं पश्यत्यज्ञानयोगतः ॥ ८२ ॥

▼

Edit Permalink Bookmark

यद्वदग्नौ मणित्वं हि मणौ वा वह्निता पुमान् ।तद्वदात्मनि देहत्वं पश्यत्यज्ञानयोगतः ॥ ८३ ॥

▼

Edit Permalink Bookmark

अभ्रेषु सत्सु धावत्सु धावन्निव यथा शशी ।तद्वदात्मनि देहत्वं पश्यत्यज्ञानयोगतः ॥ ८४ ॥

▼

Edit Permalink Bookmark

यथैव दिग्विपर्यासो मोहाद्भवति कस्यचित् ।तद्वदात्मनि देहत्वं पश्यत्यज्ञानयोगतः ॥ ८५ ॥

▼

Edit Permalink Bookmark

यथा शशी जले भाति चञ्चलत्वेन कस्यचित् ।तद्वदात्मनि देहत्वं पश्यत्यज्ञानयोगतः ॥ ८६ ॥

▼

Edit Permalink Bookmark

एवमात्मनि नज्ञाते देहाध्यासो हि जायते ।स एवात्मा परिज्ञातो लीयते च परात्मनि ॥ ८७ ॥

▼

Edit Permalink Bookmark

सर्वमात्मतया ज्ञातं जगत्स्थावरजङ्गमम् ।अभावात्सर्वभावानां देहानां चात्मता कुतः ॥ ८८ ॥

▼

Edit Permalink Bookmark

आत्मानं सततं जानन्कालं नय महामते ।प्रारब्धमखिलं भुञ्जन्नोद्वेगं कर्तुमर्हसि ॥ ८९ ॥

▼

Edit Permalink Bookmark

उत्पन्नेऽप्यात्मविज्ञाने प्रारब्धं नैव मुञ्चति ।इति यच्छ्रूयते शास्त्रात्तन्निराक्रियतेऽधुना ॥ ९० ॥

▼

Edit Permalink Bookmark

तत्त्वज्ञानोदयादूर्ध्वं प्रारब्धं नैव विद्यते ।देहादीनामसत्यत्वाद्यथा स्वप्नः प्रबोधतः ॥ ९१ ॥

▼

Edit Permalink Bookmark

कर्म जन्मान्तरकृतं प्रारब्धमिति कीर्तितम् ।तत्तु जन्मान्तराभावात्पुंसो नैवास्ति कर्हिचित् ॥ ९२ ॥

▼

Edit Permalink Bookmark

स्वप्नदेहो यथाभ्यस्तस्तथैवायं हि देहकः ।अध्यस्तस्य कुतो जन्म जन्माभावे स्थितिः कुतः ॥ ९३ ॥

▼

Edit Permalink Bookmark

उपादानं प्रपञ्चस्य मृद्भाण्डस्येव कथ्यते ।अज्ञानं चैव वेदान्तैस्तस्मिन्नष्टे क्व विश्वता ॥ ९४ ॥

▼

Edit Permalink Bookmark

यथा रज्जुं परित्यज्य सर्पं गृह्णाति वै भ्रमात् ।तद्वत्सत्यमविज्ञाय जगत्पश्यति मूढधीः ॥ ९५ ॥

▼

Edit Permalink Bookmark

रज्जुरूपे परिज्ञाते सर्पभ्रान्तिर्न तिष्ठति ।अधिष्ठाने तथा ज्ञाते प्रपञ्चः शून्यतां व्रजेत् ॥ ९६ ॥

▼

Edit Permalink Bookmark

देहस्यापि प्रपञ्चत्वात्प्रारब्धावस्थितिः कुतः ।अज्ञानिजनबोधार्थं प्रारब्धं वक्ति वै श्रुतिः ॥ ९७ ॥

▼

Edit Permalink Bookmark

क्षीयन्ते चास्य कर्माणि तस्मिन्दृष्टे परावरे ।बहुत्वं तन्निषेधार्थं श्रुत्या गीतं च वै स्फुटम् ॥ ९८ ॥

▼

Edit Permalink Bookmark

उच्यतेऽज्ञैर्बलाच्चैतत्तदानर्थद्वयागमः ।वेदान्तमतहानं च यतो ज्ञानमिति श्रुतिः ॥ ९९ ॥

▼

Edit Permalink Bookmark

त्रिपञ्चाङ्गान्यथो वक्ष्ये पूर्वोक्तस्यैव सिद्धये ।तैश्च सर्वैः सदा कार्यं निदिध्यासनमेव तु ॥ १०० ॥

▼

Edit Permalink Bookmark

नित्याभ्यासादृते प्राप्तिर्न भवेत्सच्चिदात्मनः ।तस्माद्ब्रह्म निदिध्यासेज्जिज्ञासुः श्रेयसे चिरम् ॥ १०१ ॥

▼

Edit Permalink Bookmark

यमो हि नियमस्त्यागो मौनं देशश्च कालतः ।आसनं मूलबन्धश्च देहसाम्यं च दृक्स्थितिः ॥ १०२ ॥

▼

Edit Permalink Bookmark

प्राणसंयमनं चैव प्रत्याहारश्च धारणा ।आत्मध्यानं समाधिश्च प्रोक्तान्यङ्गानि वै क्रमात् ॥ १०३ ॥

▼

Edit Permalink Bookmark

सर्वं ब्रह्मेति विज्ञानादिन्द्रियग्रामसंयमः ।यमोऽयमिति संप्रोक्तोऽभ्यसनीयो मुहुर्मुहुः ॥ १०४ ॥

▼

Edit Permalink Bookmark

सजातीयप्रवाहश्च विजातीयतिरस्कृतिः ।नियमो हि परानन्दो नियमात्क्रियते बुधैः ॥ १०५ ॥

▼

Edit Permalink Bookmark

त्यागः प्रपञ्चरूपस्य चिदात्मत्वावलोकनात् ।त्यागो हि महतां पूज्यः सद्यो मोक्षमयो यतः ॥ १०६ ॥

▼

Edit Permalink Bookmark

यतो वाचो निवर्तन्ते अप्राप्य मनसा सह ।यन्मौनं योगिभिर्गम्यं तद्भजेत्सर्वदा बुधः ॥ १०७ ॥

▼

Edit Permalink Bookmark

वाचो यस्मान्निवर्तन्ते तद्वक्तुं केन शक्यते ।प्रपञ्चो यदि वक्तव्यः सोऽपि शब्दविवर्जितः ॥ १०८ ॥

▼

Edit Permalink Bookmark

इति वा तद्भवेन्मौनं सतां सहजसंज्ञितम् ।गिरा मौनं तु बालानां प्रयुक्तं ब्रह्मवादिभिः ॥ १०९ ॥

▼

Edit Permalink Bookmark

आदावन्ते च मध्ये च जनो यस्मिन्न विद्यते ।येनेदं सततं व्याप्तं स देशो विजनः स्मृतः ॥ ११० ॥

▼

Edit Permalink Bookmark

कलनात्सर्वभूतानां ब्रह्मादीनां निमेषतः ।कालशब्देन निर्दिष्टो ह्यखण्डानन्द अद्वयः ॥ १११ ॥

▼

Edit Permalink Bookmark

सुखेनैव भवेद्यस्मिन्नजस्रं ब्रह्मचिन्तनम् ।आसनं तद्विजानीयान्नेतरत्सुखनाशनम् ॥ ११२ ॥

▼

Edit Permalink Bookmark

सिद्धं यत्सर्वभूतादि विश्वाधिष्ठानमव्ययम् ।यस्मिन्सिद्धाः समाविष्टास्तद्वै सिद्धासनं विदुः ॥ ११३ ॥

▼

Edit Permalink Bookmark

यन्मूलं सर्वभूतानां यन्मूलं चित्तबन्धनम् ।मूलबन्धः सदा सेव्यो योगोऽसौ राजयोगिनाम् ॥ ११४ ॥

▼

Edit Permalink Bookmark

अङ्गानां समतां विद्यात्समे ब्रह्मणि लीयते ।नो चेन्नैव समानत्वमृजुत्वं शुष्कवृक्षवत् ॥ ११५ ॥

▼

Edit Permalink Bookmark

दृष्टिं ज्ञानमयीं कृत्वा पश्येद्ब्रह्ममयं जगत् ।सा दृष्टिः परमोदारा न नासाग्रावलोकनी ॥ ११६ ॥

▼

Edit Permalink Bookmark

द्रष्टृदर्शनदृश्यानां विरामो यत्र वा भवेत् ।दृष्टिस्तत्रैव कर्तव्या न नासाग्रावलोकनी ॥ ११७ ॥

▼

Edit Permalink Bookmark

चित्तादिसर्वभावेषु ब्रह्मत्वेनैव भावनात् ।निरोधः सर्ववृत्तीनां प्राणायामः स उच्यते ॥ ११८ ॥

▼

Edit Permalink Bookmark

निषेधनं प्रपञ्चस्य रेचकाख्यः समीरणः ।ब्रह्मैवास्मीति या वृत्तिः पूरको वायुरीरितः ॥ ११९ ॥

▼

Edit Permalink Bookmark

ततस्तद्वृत्तिनैश्चल्यं कुम्भकः प्राणसंयमः ।अयं चापि प्रबुद्धानामज्ञानां प्राणपीडनम् ॥ १२० ॥

▼

Edit Permalink Bookmark

विषयेष्वात्मतां दृष्ट्वा मनसश्चिति मज्जनम् ।प्रत्याहारः स विज्ञेयोऽभ्यसनीयो मुमुक्षुभिः ॥ १२१ ॥

▼

Edit Permalink Bookmark

यत्र यत्र मनो याति ब्रह्मणस्तत्र दर्शनात् ।मनसो धारणायैव धारणा सा परा मता ॥ १२२ ॥

▼

Edit Permalink Bookmark

ब्रह्मैवास्मीति सद्वृत्त्या निरालम्बतया स्थितिः ।ध्यानशब्देन विख्याता परमानन्ददायिनी ॥ १२३ ॥

▼

Edit Permalink Bookmark

निर्विकारतया वृत्त्या ब्रह्माकारतया पुनः ।वृत्तिविस्मरणं सम्यक्समाधिर्ज्ञानसंज्ञकः ॥ १२४ ॥

▼

Edit Permalink Bookmark

एवं चाकृत्रिमानन्दं तावत्साधु समभ्यसेत् ।वश्यो यावत्क्षणात्पुंसः प्रयुक्तः स भेवत्स्वयम् ॥ । १२५ ॥

▼

Edit Permalink Bookmark

ततः साधननिर्मुक्तः सिद्धो भवति योगिराट् ।तत्स्वरूपं न चैकस्य विषयो मनसो गिराम् ॥ १२६ ॥

▼

Edit Permalink Bookmark

समाधौ क्रियमाणे तु विघ्ना आयान्ति वै बलात् ।अनुसंधानराहित्यमालस्यं भोगलालसम् ॥ १२७ ॥

▼

Edit Permalink Bookmark

लयस्तमश्च विक्षेपो रसास्वादश्च शून्यता ।एवं यद्विघ्नबाहुल्यं त्याज्यं ब्रह्मविदा शनैः ॥ १२८ ॥

▼

Edit Permalink Bookmark

भाववृत्त्या हि भावत्वं शून्यवृत्त्या हि शून्यता ।ब्रह्मवृत्त्या हि पूर्णत्वं तथा पूर्णत्वमभ्यसेत् ॥ १२९ ॥

▼

Edit Permalink Bookmark

ये हि वृत्तिं जहत्येनां ब्रह्माख्यां पावनीं पराम् ।वृथैव ते तु जीवन्ति पशुभिश्च समा नराः ॥ १३० ॥

▼

Edit Permalink Bookmark

ये हि वृत्तिं विजानन्ति ये ज्ञात्वा वर्धयन्त्यपि ।ते वै सत्पुरुषा धन्या वन्द्यास्ते भुवनत्रये ॥ १३१ ॥

▼

Edit Permalink Bookmark

येषां वृत्तिः समावृद्धा परिपक्वा च सा पुनः ।ते वै सद्ब्रह्मतां प्राप्ता नेतरे शब्दवादिनः ॥ १३२ ॥

▼

Edit Permalink Bookmark

कुशला ब्रह्मवार्तायां वृत्तिहीनाः सुरागिणः ।तेऽप्यज्ञानितमा नूनं पुनरायान्ति यान्ति च ॥ १३३ ॥

▼

Edit Permalink Bookmark

निमेषार्धं न तिष्ठन्ति वृत्तिं ब्रह्ममयीं विना ।यथा तिष्ठन्ति ब्रह्माद्याः सनकाद्याः शुकादयः ॥ १३४ ॥

▼

Edit Permalink Bookmark

कार्ये कारणतायाता कारणे न हि कार्यता ।कारणत्वं स्वतो गच्छेत्कार्याभावे विचारतः ॥ १३५ ॥

▼

Edit Permalink Bookmark

अथ शुद्धं भवेद्वस्तु यद्वै वाचामगोचरः ।द्रष्टव्यं मृद्घटेनैव दृष्टान्तेन पुनः पुनः ॥ १३६ ॥

▼

Edit Permalink Bookmark

अनेनैव प्रकारेण वृत्तिर्ब्रह्मात्मिका भवेत् ।उदेति शुद्धचित्तानां वृत्तिज्ञानं ततः परम् ॥ १३७ ॥

▼

Edit Permalink Bookmark

कारणं व्यतिरेकेण पुमानादौ विलोकयेत् ।अन्वयेन पुनस्तद्धि कार्ये नित्यं प्रपश्यति ॥ १३८ ॥

▼

Edit Permalink Bookmark

कार्ये हि कारणं पश्येत्पश्चात्कार्यं विसर्जयेत् ।कारणत्वं स्वतो नश्येदवशिष्टं भवेन्मुनिः ॥ १३९ ॥

▼

Edit Permalink Bookmark

भावितं तीव्रवेगेण वस्तु यन्निश्चयात्मना ।पुमांस्तद्धि भवेच्छीघ्रं ज्ञेयं भ्रमरकीटवत् ॥ १४० ॥

▼

Edit Permalink Bookmark

अदृश्यं भावरूपं च सर्वमेतच्चिदात्मकम् ।सावधानतया नित्यं स्वात्मानं भावयेद्बुधः ॥ १४१ ॥

▼

Edit Permalink Bookmark

दृश्यं ह्यदृश्यतां नीत्वा ब्रह्माकारेण चिन्तयेत् ।विद्वान्नित्यसुखे तिष्ठेद्धिया चिद्रसपूर्णया ॥ १४२ ॥

▼

Edit Permalink Bookmark

एभिरङ्गैः समायुक्तो राजयोग उदाहृतः ।किंचित्पक्वकषायाणां हठयोगेन संयुतः ॥ १४३ ॥

▼

Edit Permalink Bookmark

परिपक्वं मनो येषां केवलोऽयं च सिद्धिदः ।गुरुदैवतभक्तानां सर्वेषां सुलभो जवात् ॥ १४४ ॥

▼

Edit Permalink Bookmark

इति श्रीमत्परमहंसपरिव्राजकाचार्यस्य श्रीगोविन्दभगवत्पूज्यपादशिष्यस्य श्रीमच्छंकरभगवतः कृतौ अपरोक्षानुभूतिः समाप्ता ॥

▼

Edit Permalink Bookmark