श्रीअम्बिकास्तवःA machine-readable editionArun PrasadArun PrasadCreation of machine-readable version.Ambuda (https://ambuda.org)
Distributed by Ambuda under a Creative Commons CC0 1.0 Universal Licence (public domain)
2026-05-10This text has been created by direct export from Ambuda's proofing environment.स्तोत्रार्णवःV. Chandrasekaran, M.A., L.T.Government Oriental Manuscripts LibraryMadras1961
Ambuda is an online library of Sanskrit literature.
Normalization of whitespace around dandas and other punctuation marks.
७. ॥ अथ श्री अम्बिकास्तवः ॥श्रीगिरीशप्रियां चिन्तितार्थप्रदांरत्नताटङ्किणीं राजबिम्बाननाम् ।सैरिभेन्द्रादिमत्तेभपञ्चानना-मापदुत्तारिणीमम्बिकामाश्रये ॥ १ ॥वारुणीसेवितां कीरवाणीस्तुतांशत्रुसंहारिणीं श्रेयसः कारिणीम् ।वारुणीपारणां चारुसञ्चारिणी-मापदुत्तारिणीमम्बिकामाश्रये ॥ २ ॥सत्रयीकोणमध्यस्थबिन्दूपरि-प्रस्फुरद्रत्नसिंहासनाधिष्ठिताम् ।सर्वसौभाग्यसन्धायिनीं मायिनी-मापदुत्तारिणीमम्बिकामाश्रये ॥ ३ ॥मातृकाभिः परीवारितां किञ्चिदु-न्मीलतां धीवरप्रेक्षणानन्दिनीम् ।मत्तमातङ्गकुम्भोरुवक्षोरुहा-मापदुत्तारिणीमम्बिकामाश्रये ॥ ४ ॥यक्षगन्धर्वसिद्धाङ्गनामौलिग-र्भस्थसूनातिसंवासिताङ्घ्रिद्वयम् ।मातृकारूपिणीं मातृयन्त्रात्मिका-मापदुत्तारिणीमम्बिकामाश्रये ॥ ५ ॥वीरमाहेश्वरीं चारुधर्मक्रियांपारगात्रान्तरागारसंवासिनीम् ।किङ्कराशेषसंपत्करीं शाङ्करी-मापदुत्तारिणीमम्बिकामाश्रये ॥ ६ ॥ऐन्द्रवज्रादिकान्तिच्छटारञ्जिनींशेखरीभूतशुक्लेन्दुरेखाभराम् ।मन्जुमञ्जीरशिञ्जत्पदाम्भोरुहा-मापदुत्तारिणीमम्बिकामाश्रये ॥ ७ ॥वामहस्तेन जिह्वाञ्चलां वैरिणःपाणिना दक्षिणेनायुधं मुद्गरम् ।बिभ्रतीं पीतवर्णाम्बरालङ्कृता-मापदुत्तारिणीमम्बिकामाश्रये ॥ ८ ॥पुस्तकं पाशमक्षत्रजं चाङ्कुशंदोलताभिर्दधानां त्रिनेत्रान्विताम् ।बालिकां त्रैपुरीपुण्डरीकप्रभा-मापदुत्तारिणीमम्बिकामाश्रये ॥ ९ ॥ब्रह्मशौरीन्द्रमुख्यामरप्राप्तना-नायुधाच्छाननां स्रग्विभूषान्विताम् ।भर्गपत्नीं सुदुर्गामभीष्टप्रदा-मापदुत्तारिणीमम्बिकामाश्रये ॥ १० ॥॥ इति श्रीमत्परमहंसपरिव्राजकाचार्यविरचितमम्बिकास्तोत्रं सम्पूर्णम् ॥